हेमजा । पोखरा–२० भलाम तथा मौजावासी वर्षौ अघिदेखि जोखिमयुक्त यात्रा गर्न बाध्य छन् । पोखरास्थित मनिपाल शिक्षण अस्पतालदेखि भलाम हुँदै मौजा जोड्ने उक्त सडकखण्ड अन्तर्गत कालीखोला नजिकै सडक धाँजा फाटेको वर्षौ बित्दासमेत सुधारका लागि सम्बन्धित निकायको ध्यान पुग्न सकेको छैन । सो क्षेत्रमा करिब ३० मिटर सडक पुरै धाँजा फाटेर केही भासिएको र सडक छेउमा ठूलो पहिरोसमेत गएको छ । त्यसका साथै त्यहाँको धरातलीय अवस्थासमेत निकै कमजोर पाइन्छ ।
आफूहरुले त्यस क्षेत्रको सडक सुधारबारे सम्बन्धित निकायलाई पटकपटक ध्यानाकर्षण गराउँदै आएको भए पनि हालसम्म कुनै सुनुवाई नभएको भलामका गणेशबहादुर विकले बताए । सो सडकखण्ड जोखिमपूर्ण बन्दा कतिपय यात्रु पैदल हिँड्ने गरेका छन् भने विशेष गरी ठूलो तथा मालवाहक सवारीलाई सकस हुँदै आइरहेको छ ।
