Welcome to the complete news site

ओलीको सूचीमा नभएका सिंह, प्याकुरेल र सरकार बने सर्वसम्मत केन्द्रीय सदस्य

0 20

नेकपा एमालेका अध्यक्ष केपी शर्मा ओलीले सर्वसम्मतिका लागि भन्दै आइतबार पेस गरेको केन्द्रीय सदस्यको सूचीमा नभएका तीन जना सर्वसम्मत रूपमा केन्द्रीय सदस्य चुनिएका छन्।

भूगोलतर्फ प्रदेश २ को खुलामा अरविन्द सिंह र सुमन प्याकुरेल सर्वसम्मत भएका हुन्। ओलीले प्रस्तुत गरेको सूचीमा रहेका प्रभु हजाराले मधेसी कोटामा उम्मेदवारी दिएका छन् भने मोहम्मद समिरले मुस्लिम कोटामा उम्मेदवारी हालेका छन्।

उनीहरू अर्कै समूहमा गएपछि सिंह र प्याकुरेलले प्रदेश २ को खुला कोटामा उम्मेदवारी दिएका हुन्। अब उनीहरूसँगै रामदयाल मण्डल, प्रभु साह, राजकुमार लेखी र लीलाराज श्रेष्ठ प्रदेश २ खुलाबाट केन्द्रीय सदस्य बनेका छन्।

प्रदेश २ को महिला कोटामै ओलीले नराखेकी रञ्जना सरकार पनि सर्वसम्मत भएकी छन्। ओलीले प्रदेश २ को महिला कोटामा कल्पना कटुवाल, रेखा झा र ज्वाला साहको नाम राखेका थिए। ज्वाला साहको नाम जनजाति महिला समूहमा पनि रहेकाले उनले प्रदेश २ को महिला कोटामा उम्मेदवारी दिइनन्। उनको ठाउँमा उम्मेदवारी दिएकी सरकार पनि सर्वसम्मत भएकी छन्।

एमालेले हरेक भूगोलअन्तर्गत हरेक प्रदेशबाट ६ जना खुला र ३ जना महिला केन्द्रीय सदस्य बन्ने व्यवस्था गरेको छ।